Cumenti scieus, su Stadu italianu giai de diora arreconnoscit me in is diversidadis linguìsticas una sienda de difendi e promovi. Po custu fatu, s’articulu 6 de sa Costitutzioni, una Lei regionali (26/97) e una Lei natzionali (482/99) donant is ainas po ndi strantaxai su bilinguismu sardu – italianu, est a nai a ndi pesai paris is duas lìnguas chi si chistionant e si connoscint.
In Sardìnnia su bilinguismu at a essi cumpriu candu in dònnia logu de sa vida civili e sociali (Ufìtzius Pùblicus, Scola, Universidadi) s’at a chistionai, cun sa matessi dinnidadi, su sardu e s’italianu.
Cun custa idea su comunu de SU MASU, cun su incuru de s’Associatzioni “Sa Bèrtula Antiga”, at bòfiu oberri po totu sa bidda s’Ufìtziu Lìngua Sarda chi atendit:
– a su traballu de tragai in sardu is atus aministrativus e is deliberas chi ndi essint de s’Aministratzioni comunali;
– a sa genti chi bolit furriai in sardu lìteras, paperis, poesias o obras literàrias;
– a apariciai in sardu manifestus de s’Aministratzioni e de is Associatzionis de sa bidda;
– a sa circa apitzus de su connotu, de sa fueddada de sa bidda e de is nòminis de is logus puru.
Faina prus de importu po s’Ufìtziu Lìngua sarda est su de apariciai cursus de lìngua sarda po sa genti de sa bidda, po is aministradoris e po is impreaus de su Comunu. Difatis, a s’ora s’Ufìtziu est afainau apariciendi unu cursu de lìngua sarda Po impreaus e aministradoris.
Sa presentada de su cursu s’at a tenni su 28 de su mesi de Ladàmini a mesudì mancu cuartu in s’aposentu de sa Giunta. Bos invitaus a presentziai.
S’Ufìtziu Lìngua Sarda dd’agatais obertu su de duus e su de cuatru martis de su mesi; s’impreau chi atendit a su traballu at a tenni prexeri meda de traballai cun is Associatzionis, cun sa genti de sa bidda po donai a sa lìngua sarda s’importàntzia chi ddi minescit.
Per ulteriori informazioni consultare il sito www.sabertulantiga.com/uffiziusu/Elmas/UfitziuIndex.html